ҚР Қаржы министрлігі Қазақстанның астық нарығы үшін апатты болуы мүмкін ұсынысты талқылауға ұсынды: ауыл шаруашылығы өнімдеріне экспорттық баж салығын енгізу. Оның ішінде бидай экспортына тоннасына 30 доллар мөлшерінде баж салу ұсынылды.Егер бұл орын алса (барлық сарапшылар бұған үзілді-кесілді қарсылық білдірсе де), бидай бағасы осы баж мөлшеріне немесе тоннасына 15 мың теңгеге төмендейді. Ал бұл - қазақстандық фермерлер алатын табыстың мөлшері.
Басқаша айтқанда, экспорттық баждарды енгізу астық өндірісінің табыстылығын жояды, соның салдарынан аграршылардың банкроттығы, ауылдағы жұмыс орындарының жоғалуы және ауылдардың қалаларға жаппай қоныс аударуы орын алады. Бұл пікірмен ElDala.kz порталына берген сұхбатында Қазақстанның Астық одағының талдау комитетінің басшысы Евгений Карабанов бөлісті.
Бұдан кім пайда көреді? Мүмкін, тек астық өңдеушілер ғана қысқа мерзімге арзан шикізат алады. Бірақ бұл тек фермерлер қалған қорларын сатқанға дейін жалғасады. Осыдан кейін өңдеушілер бидай алқаптарының күрт азаюына байланысты шикізат қорын жоғалтады.
- Егер баждар енгізілсе, Қазақстан ұн экспортын жылына 100-200 мың тоннаға ғана арттыра алады, - деп түсіндірді Евгений Карабанов. - Бірақ бұл аз көлем үшін бүкіл нарықты бұзу керек пе? Ақылға келіп, баждар енгізілмейді деп үміттенемін.ҚР Ауыл шаруашылығы министрлігі де ауыл шаруашылығы өнімдеріне экспорттық баждарға қарсы шықты. Аграрлық ведомство өзінің түйіндемесін ҚР Қаржы министрлігіне жолдады.
Дереккөз: https://eldala.kz/kz/novosti/ehlevatory/24850-minfin-provociruet-krah-zernovogo-rynka-kazahstana
