Қазақстанда астықты терең өңдеу қазіргі уақытта жылына шамамен 510 мың тонна шикізатты қамтиды. 2029 жылға қарай елде жылына шамамен 5,8 млн тонна астықты терең өңдеу қуаттарын құру жоспарланып отыр. Осы мақсатта жалпы құны шамамен 4 млрд доллар болатын алты ірі жобадан тұратын портфель қалыптастырылды, деп үкіметте хабарлады.Қазіргі уақытта елде крахмал өнімдерін, глютен және биоэтанол өндіретін үш мамандандырылған кәсіпорын жұмыс істейді.
2025 жылы Қазақстанда шамамен 152 мың тонна крахмал өнімі өндірілді. Бұл бір жыл бұрынғы көрсеткіштен 28,2%-ға көп. Биоэтанол өндірісі 21 мың тоннаға жетіп, 2,2 есе өсті.
2026 жылдың қаңтар–маусым айларында 67,5 мың тонна крахмал өнімі өндірілді, оның 35,6 мың тоннасы экспортқа жөнелтілді.
Жаңа жобалар крахмал, глютен, шәрбат, биоэтанол, аминқышқылдары, жем компоненттері және терең өңдеудің өзге де өнімдерін өндіруді көздейді. Оларды Түркістан, Жамбыл, Қостанай, Ақмола облыстарында және Астанада іске асыру жоспарланған.
Жобалардың бір бөлігі практикалық іске асыру кезеңіне өтті. «Қазкрахмал» кәсіпорны пайдалануға берілді, ал жүгеріні өңдейтін Fufeng жобасы алғашқы өнімін шығарды.
Бұдан бөлек, мал шаруашылығы саласында да қайта өңдеу дамып келеді: Қазақстанда шамамен 210 ет өңдеу кәсіпорны және сүт өнеркәсібінде 180-ге жуық кәсіпорын жұмыс істейді. Кәсіпорындар шұжық өнімдерін, ет консервілерін, жартылай фабрикаттарды, ашымалы сүт өнімдерін және басқа да дайын өнімдерді өндіру көлемін арттырып жатыр. 2025 жылы ет консервілерін өндіру 48,3%-ға өсті.
Келешекті бағыттардың қатарында жүн мен жеміс-көкөніс өнімдерін өңдеу, сондай-ақ құрама жем өндіру бар.
2024–2026 жылдары қайта өңдеу кәсіпорындарының айналым қаражатын қаржыландыруға шамамен 230 млрд теңге бағытталды. Осы кезеңде ауыл шаруашылығы өнімдерін қайта өңдеу бойынша жалпы құны 42,3 млрд теңге болатын 39 инвестициялық жоба қаржыландырылды.
Дереккөз: https://eldala.kz/kz/novosti/zerno/25613-moshchnosti-glubokoy-pererabotki-zerna-v-kazahstane-uvelichat-...
