Астықты экспортқа тасымалдау кезінде жекелеген бағыттарда 20%-дан 60%-ға дейін жеңілдіктер қолданылады. Атап айтқанда, ҚТЖ Өзбекстан, Түрікменстан және Ресей аумағы арқылы тасымалдау кезінде төмендетілген тарифтер қарастырылғанын хабарлады.Өзбекстан аумағындағы Келес — Галаба учаскесінде тасымалдау көлеміне қарай жеңілдік 30%-дан 50%-ға дейінгі аралықты құрайды. Келес — Ходжадавлет және Қарақалпақстан — Галаба бағыттарында тиісінше 60% және 40% жеңілдіктер қолданылады.
Түрікменстан аумағында бағытқа қарай 30%-дан 50%-ға дейінгі жеңілдіктер қарастырылған. Ресей аумағындағы Қиғаш — Самур бағытында 40% жеңілдік бар, ал Калининград теміржолының қатысуымен жүзеге асырылатын тасымалдарға 20% жеңілдік қолданылады.
Тарифтік шарттар туралы ҚТЖ өкілдері Қостанай мен Көкшетауда өткен Астық штабының көшпелі отырыстарында айтып берді. Жиында жаңа өнімді тасымалдау, экспорттық бағыттар, вагондардың қолжетімділігі және фитосанитариялық бақылаудан өту мәселелері талқыланды.
2026 жылғы қаңтар-тамыз айларында ҚТЖ желісі бойынша 9,3 млн тонна астық тасымалданды. Бұл өткен жылдың сәйкес кезеңімен салыстырғанда 13%-ға көп. Экспорт көлемі 14%-ға өсіп, 7,2 млн тоннаға жетті, ал республикаішілік тасымал 8%-ға артып, 2,1 млн тоннаны құрады. Тамыз айында рекордтық 1,2 млн тонна астық тасымалданды, бұл бір жыл бұрынғы көрсеткіштен 35%-ға жоғары.
Ақмола облысы тамыз айының басынан бері шамамен 520 мың тонна астық жөнелтті. Бұл ел бойынша жалпы көлемнің 31%-ын құрайды. Оның 409 мың тоннасы экспортқа, 111 мың ішкі бағыттарға жөнелтілді. Астық маусымы басталғалы облыстан шамамен 80 маршруттық құрам жөнелтілді.
Қостанай облысында сегіз айда 1,8 млн тоннадан астам астық тиелді. Оның 1,4 млн тоннадан астамы экспортқа жөнелтілді. Негізгі бағыт Өзбекстан болды — 606,4 мың тонна немесе облыстан экспортталған астықтың 43%-ы. Сонымен қатар астық Ресейге, Ауғанстанға, Тәжікстанға, Қытайға және басқа да елдерге жеткізілді.
ҚТЖ жаңа өнімді тасымалдауға желінің дайын екенін хабарлады. Қазір тасымалға шамамен 16 мың астық таситын вагон, 17,8 мыңнан астам жабық вагон және 1 710 локомотив жұмылдырылған. Жыл басынан бері парк 169 локомотивпен толықтырылды.
Бұған дейін Қазақстанның Астық одағының талдау комитетінің басшысы Евгений Карабанов астық тасымалы кезінде логистика құнының өскенін хабарлаған болатын.
Дереккөз: https://eldala.kz/kz/novosti/kazahstan/25587-o-skidkah-na-eksportnuyu-perevozku-zerna-rasskazali-v-ktzh
