Қазақстан Республикасы Ауыл шаруашылығы министрлігінде ведомство басшысы Айдарбек Сапаровтың төрағалығымен агроөнеркәсіптік кешеннің өңдеу өнеркәсібін дамыту мәселелеріне арналған алқа отырысы өтті.Алқа жұмысына Ауыл шаруашылығы министрлігінің ведомстволық бағынысты ұйымдарының басшылары, облыстар мен Шымкент қаласы әкімдерінің орынбасарлары, өңірлік ауыл шаруашылығы, ветеринария және балық шаруашылығы басқармаларының өкілдері, жер ресурстарын басқару департаменттері мен министрліктің аумақтық бөлімшелерінің қызметкерлері қатысты.
Отырысты ашқан Айдарбек Сапаров ауыл шаруашылығы өнімдерін қайта өңдеу агроөнеркәсіптік кешенді дамытудың басым бағыттарының бірі болып қала беретінін атап өтті. Оның айтуынша, бұл сала елдің азық-түлік қауіпсіздігін қамтамасыз етуге, қосылған құны жоғары өнім шығаруға және экспорттық әлеуетті нығайтуға маңызды үлес қосады.
«Жүйелі мемлекеттік қолдаудың арқасында аграршылар қаржылық ресурстарға қол жеткізіп, агротехнологиялардың толық циклін сақтауға мүмкіндік алды. Бүгінде Қазақстан ішкі нарықты негізгі азық-түлік түрлерімен іс жүзінде толық қамтамасыз етіп отыр. Импортқа тәуелді бағыттар бойынша инвесторларды тарту және жаңа жобаларды іске асыру үшін қолайлы жағдай жасау жұмыстары жалғасуда. Біздің міндетіміз – АӨК-тегі қайта өңделген өнім үлесін 70%-ға дейін жеткізу және жоғары қосылған құны бар өнім өндірісін ұлғайту», – деді министр.
Саланың қазіргі жағдайы мен даму перспективалары туралы Ауыл шаруашылығы вице-министрі Ермек Кенжеханұлы баяндады. Оның айтуынша, қайта өңдеу кәсіпорындарын қолдау мақсатында мемлекет тарапынан жеңілдетілген қаржыландыру және инвестициялық субсидиялау шаралары жүзеге асырылуда.
2024–2025 жылдары айналым қаражатын толықтыру үшін 196 қайта өңдеу кәсіпорнына жалпы көлемі 131 млрд теңге болатын қаржыландыру берілді. 2026 жылы осы мақсаттарға шамамен 100 млрд теңге қарастырылған.
2025 жылы қайта өңдеу саласында жалпы құны 120,4 млрд теңгені құрайтын 53 инвестициялық жоба пайдалануға берілді. Мемлекеттік қолдау шаралары саланың дамуына оң әсерін тигізуде. 2025 жылдың қорытындысы бойынша азық-түлік өндірісінің көлемі 3,9 трлн теңгеге жетіп, 8,1%-ға өсті.
Оң үрдіс биыл да сақталып отыр. 2026 жылдың қаңтар–сәуір айларында сала кәсіпорындары 1,4 трлн теңгенің өнімін өндіріп, өткен жылдың сәйкес кезеңімен салыстырғанда 14,4%-ға артық көрсеткішке қол жеткізді. Өңдеу өнеркәсібінің негізгі капиталына салынған инвестициялар екі еседен астам өсіп, 389 млрд теңгеден асты.
Қайта өңделген өнім экспорты 3,6 млрд АҚШ долларына жетсе, оның агроөнеркәсіптік кешен өнімдерінің жалпы экспортындағы үлесі 51,4%-ды құрады.
Отырыста сондай-ақ астықты терең өңдеу, май өңдеу саласы мен қант өнеркәсібін дамыту, сондай-ақ сүт және ет өңдеу кәсіпорындарын жаңғырту мәселелері қаралды.
Қазақстанның ұн экспорты бойынша әлемдегі жетекші позицияларын сақтап отырғаны, өсімдік майын экспорттайтын ірі елдердің қатарына кіретіні және астық пен майлы дақылдарды терең өңдеу өнімдерінің өндірісін кезең-кезеңімен арттырып келе жатқаны атап өтілді.
Сонымен қатар қант саласын, жүн мен тері өңдеуді дамыту, сондай-ақ сүт және ет өңдеу кәсіпорындарын отандық шикізатпен қамтамасыз ету бағытындағы жұмыстар жалғасуда.
Алқа барысында ауыл шаруашылығы өнімдерін қайта өңдеу көрсеткіштері мен инвестициялық жобаларды іске асыру бойынша артта қалған өңірлер әкімдерінің орынбасарларының есептері тыңдалды.
Отырысты қорытындылаған Айдарбек Сапаров қайта өңдеу саласының тұрақты дамып келе жатқанын атап өтіп, азық-түлік өндірісін ұлғайту және АӨК-тегі қайта өңделген өнім үлесін арттыру жөніндегі белгіленген көрсеткіштерге қол жеткізуді, жобаларды іске асыруды жеделдетуді, кәсіпорындарды жаңғырту жұмыстарын жалғастыруды және қайта өңдеу өндірістерінің дерекқорын өзектендіруді тапсырды.
Дереккөз: https://agrosearch.kz/kk/news/v-kazaxstane-namereny-uvelicit-dolyu-pererabotannoi-produkcii-v-apk-do-70
