Халықаралық EURASIAN AGRICOM-2026 конференциясы 30 қыркүйек – 1 қазан күндері Rixos President Astana қонақ үйінде өтеді. Сессиялардың бірі 2026/27 маусымындағы жаңа егін мен сауда келешектерін бағалауға арналады. Сондай-ақ сарапшылар астық экспорттаушыларына ҚҚС-ты қайтару мәселесін талқылайды.Конференцияның бастамашысы – Қазақстанның Астық одағының хабарлауынша, сессияда ҚР Қаржы министрлігінің Мемлекеттік кірістер комитеті өкілінің сөз сөйлеуі жоспарланған. Ол ҚҚС-ты қайтару мәселесінен бөлек, цифрлық теңгені пайдалану туралы да айтып береді.
«Қатысушыларға экспорттаушылар мен контрагенттер арасындағы есеп айырысуда цифрлық теңгені қолданудың практикалық аспектілері таныстырылады. Атап айтқанда, салық міндеттемелерінің ашықтығы, автоматты салыстырып тексеру, есеп айырысуларды қадағалау, көлеңкелі схемаларға қарсы іс-қимыл және ҚҚС-ты жедел қайтару мәселелері қаралады», – деп Астық одағында хабарлады.Сессияны Қазақстанның Астық одағы Сауда комитетінің төрағасы Александр Малов жүргізеді.
Сонымен қатар EURASIAN AGRICOM конференциясында Қазақстанның Астық одағының Талдау комитетінің басшысы Евгений Карабанов «2026 жылғы егінді бағалау, астық балансы және 2026/27 маусымындағы баға белгілеу факторлары» тақырыбында баяндама жасайды. Сарапшы 2025/26 маусымындағы қазақстандық астық экспортының қорытындысын шығарып, 2026 жылғы егіннің көлемі мен сапасына баға береді. Сондай-ақ Евгений Карабанов астық импорты мен экспортына болжам жасап, ішкі сатып алу бағаларының қалыптасу факторлары туралы айтып береді.
Бұдан бөлек, пікірталас барысында сессияға қатысушылар теміржол инфрақұрылымының 2026 жылғы өнімді тасымалдауға дайындығын, тариф саясатын, жаңа шекара өткелдері мен экспорттық дәліздерді дамытуды талқылайды. Қазақстандық астық транзитінің мүмкіндіктері мен Балтық бағыты арқылы ауыстырып тиеу келешектеріне ерекше назар аударылады.
«Сессия нарық қатысушыларына 2026/27 маусымына қатысты – егін мен бағадан бастап логистика, есеп айырысу және экспортқа дейінгі негізгі бағыттар бойынша бағдар қалыптастыруға мүмкіндік береді», – деп атап өтті Астық одағында.«Қазақстан. 2026 жылғы егінді бағалау және 2026/27 маусымындағы сауда келешектері» сессиясы 1 қазанда сағат 15:30-дан 17:30-ға дейін өтеді. Өтетін орны: Rixos President Astana қонақ үйі.
Дереккөз: https://eldala.kz/kz/novosti/zerno/25601-vozvrat-nds-zernotreyderam-obsudyat-na-agricom-2026
