Ауыл шаруашылығы вице-министрі Ермек Кенжеханұлы Латвия Республикасының Климат және энергетика министрлігінің парламенттік хатшысы Янис Ирбемен кездесті, деп хабарлайды inbusiness.kz сайты.Келіссөздер барысында тараптар агроөнеркәсіптік сала бойынша екі ел ынтымақтастығының қазіргі жағдайы мен болашақ басымдықтарын талқылады. Атап айтқанда, ауыл шаруашылығы өнімдері саудасы, транзиттік-логистикалық өзара іс-қимыл, аграрлық ғылым мен білім беру саласын дамыту, ветеринариялық және фитосанитариялық қауіпсіздік мәселелері қаралды.
Латвия делегациясын қарсы ала отырып, Ермек Кенжеханұлы Қазақстан Латвиямен достық қатынастарды жоғары бағалайтынын және бұл елді Еуропалық Одақтағы маңызды әрі сенімді серіктес ретінде қарастыратынын атап өтті.
"Сіздің сапарыңыз елдеріміздің серіктестігін нығайтуға, тәжірибелік ынтымақтастықты кеңейтуге және салалық мемлекеттік органдар, ғылыми және білім беру мекемелері, сондай-ақ екі елдің бизнес-қоғамдастығы арасындағы тікелей диалогты дамытуға деген өзара қызығушылықты көрсетеді", – деді вице-министр.Кездесу барысында сауда-экономикалық ынтымақтастық мәселелеріне ерекше назар аударылды. Өткен жылдың қорытындысы бойынша Қазақстан мен Латвия арасындағы агроөнеркәсіптік кешен өнімдерінің тауар айналымы 51,4 млн АҚШ долларын құрады.
Ермек Кенжеханұлы Қазақстан жаһандық азық-түлік қауіпсіздігі жүйесінде стратегиялық маңызы бар ел екенін және әлемдегі ірі астық өндірушілердің бірі екенін атап өтті. Ел аумағындағы ауыл шаруашылығы дақылдарының егіс алқабы 24 млн гектарды құрайды, оның елеулі бөлігі дәнді дақылдарға тиесілі.
Сонымен қатар, қайта өңделген ауыл шаруашылығы өнімдерінің экспорты қарқынды дамуда. Оған ұн, құрамажем, макарон өнімдері және терең өңделген өнімдер кіреді. Қазақстан астық экспорты бойынша әлемде 10-орында, ұн экспорты бойынша 2-орында, күнбағыс майы экспорты бойынша 8-орында.
Тараптар Балтық өңірі арқылы Қазақстанның өсімдік шаруашылығы өнімдерін транзиттеу мәселесін де қарастырды. Былтыр Латвия порттары арқылы тасымал көлемі 750 мың тоннаны құраса, жыл басынан бері 250 мың тоннаға жетті.
Сондай-ақ аграрлық ғылым мен білім саласындағы ынтымақтастық келешегі де назардан тыс қалмады.
Қазақ ұлттық аграрлық зерттеу университеті мен Латвияның Жаратылыстану ғылымдары және технологиялар университеті арасындағы тиімді әріптестік туралы айтылды. Бұл ретте академиялық ұтқырлық бағдарламалары, ғылыми тағылымдамалар және бірлескен зерттеулер жүзеге асырылуда.
Вице-министр бірлескен ғылыми-зерттеу жобаларын дамытуға, Erasmus+ бағдарламасы шеңберінде өтінімдер беруге, академиялық ұтқырлықты кеңейтуге, сондай-ақ магистратура мен докторантура деңгейінде қос диплом бағдарламаларын дамытуға қызығушылық білдірді.
Одан әрі ветеринария және фитосанитариялық бақылау мәселелеріне көңіл бөлінді.
Кездесу нәтижесінде Қазақстан мен Латвияның тиісті құрылымдары арасында өсімдіктер карантині саласындағы ынтымақтастық туралы өзара түсіністік меморандумына қол қойылды.
Қос тарап бұл фитосанитариялық саладағы екіжақты ынтымақтастықты одан әрі нығайту жолындағы маңызды қадам екенін, екі елдің тиісті қызметтері арасындағы өзара іс-қимылды күшейтетінін, сондай-ақ, өсімдіктер карантині мен қорғау жүйелерін жетілдіруге және ауыл шаруашылығы өнімдері саудасын кеңейтуге ықпал ететінін атап өтті.
Сонымен қатар, тараптар бүгін Астанада өтетін Қазақстан – Латвия бизнес-форумы аясында екіжақты ынтымақтастық әлеуетін жан-жақты талқылап, мүдделі ұйымдар арасында жаңа байланыстар орнатып, екі ел арасындағы серіктестікті одан әрі дамытуға тың серпін беруге ынталы.
Источник: https://inbusiness.kz/kz/last/kazakstan-men-latviya-agroonerkasip-salasyndagy-yntymaktastykty-kushej...
